ບົດສູນທອດພົດ ກ່າວປິດກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VII

ເຂື່ອນໄຟຟ້າໄຊຍະບູລີ ຈະສຳເລັດພາຍໃນ ປີ 2019


2016-03-16

ເຂື່ອນໄຟຟ້າໄຊຍະບູລີ ຈະສຳເລັດພາຍໃນ ປີ 2019

ຂປລ. ເຂື່ອນໄຟຟ້າ ພະລັງງານນ້ຳ ໄຊຍະບູລີ​ ຈະສາມາດຜະລິດກະແສໄຟຟ້າ ໄດ້ເຖິງ 1.285 ເມກາວັດ ພາຍຫລັງສ້າງສຳເລັດ ເພື່ອສົ່ງຂາຍ ໃຫ້ປະເທດ ເພື່ອນບ້ານ (ໄທ) 1.225 ເມກາວັດ ແລະ 60 ເມກາວັດ ຊົມໃຊ້ພາຍໃນ, ປັດຈຸບັນ ພວມດຳເນີນການກໍ່ສ້າງ ​ແລະ ສຳເລັດແລ້ວ 60%. 


ຂໍ້ມູນຂອງບໍລິສັດ ໄຊຍະບູລີ ພາວເວີ ຈຳກັດ ​ໄດ້ໃຫ້ຮູ້ວ່າ:  ໂຄງການ​ໄຟຟ້າ​ພະລັງງານນ້ຳ ໄຊຍະບູລີ ຄາດວ່າ ຈະກໍ່ສ້າງໃຫ້ສຳເລັດ 100% ໃນປີ 2019 ພາຍຫລັງ ເລີ່ມລົງມືກໍ່ສ້າງມາແຕ່ ປີ 2012 ເປັນຕົ້ນມາ,  ລວມ​ມູນ​ຄ່າການລົງທຶນທັງໝົດ ​ຫລາຍ​ກວ່າ 3 ຕື້​ໂດລາ​ສະຫະລັດ, ປະກອບມີ ເຄື່ອງຈັກຜະລິດໄຟຟ້າ 8 ເຄື່ອງ, ມີກຳລັງການຜະລິດທັງໝົດ 1.285 ເມກາວັດ. ໃນນັ້ນ ມີເຄື່ອງຜະລິດໄຟຟ້າ ຂະໜາດ 175 ເມກາວັດ ຈຳນວນ 7 ຊຸດ ເພື່ອສົ່ງໄຟຟ້າ ຜ່ານລະບົບສາຍສົ່ງ 500 ກິໂລໂວນ ໃຫ້ການໄຟຟ້າຜະລິດ ແຫ່ງປະເທດໄທ ແລະ ເຄື່ອງຜະລິດໄຟຟ້າ 60 ເມກາວັດ 1 ຊຸດ ສົ່ງໄຟຟ້າຜ່ານລະບົບສາຍສົ່ງ 115 ກິໂລໂວນ ໃຫ້ແກ່ລັດວິສາຫະກິດໄຟຟ້າລາວ.

ໂຄງການດັ່ງກ່າວ, ເປັນ​ໂຄງການ​ໄຟຟ້າ​ ພະລັງງານນ້ຳ​ ແບບ​ນ້ຳ​ໄຫລຜ່ານ ​ທີ່​ບໍ່​ມີ​ການເກັບ​ກັກ​ນ້ຳ, ​ໄດ້​ມີ​ການຍົກຍ້າຍ ແລະ ຫຍັບຍ້າຍປະຊາຊົນອອກ​ຈາກພື້ນ​ທີ່​ໂຄງການ ມີພຽງແຕ່ 458 ຄອບຄົວ ຈາກ 19 ບ້ານ ​ທີ່ຢູ່ແຄມ​ສອງ​ຝັ່ງ​ຂອງ ລະຫວ່າງແຂວງ​ໄຊຍະ​ບູ​ລີ ແລະ ແຂວງຫລວງ​ພະ​ບາງ. ໃນ​ຈຳນວນ​ດັ່ງກ່າວ15 ບ້ານ ​ຈະ​ໄດ້​ຮັບ​ຜົນ​ກະທົບ​ ຈາກ​ລະດັບ​ນ້ຳ​ທີ່​ສູງ​ຂຶ້ນ ແລະ ອີກ 4 ບ້ານ​ ທີ່ຢູ່​ບໍລິເວນ​ພື້ນ​ທີ່​ກໍ່ສ້າງ ເຊິ່ງຕ້ອງ​ຍ້າຍ​ບ້ານ​ເຮືອນ​ ໄປ​ຍັງ​ພື້ນ​ທີ່ຈັດ​ສັນ​ໃຫ້ ໃໝ່​ໃນ​ບໍລິເວນ​ໃກ້​ຄຽງ ແລະ ທັງ​ໝົດ ​ແມ່ນ​ໄດ້​ຮັບ​ການ​ຊ່ວຍເຫລືອ ຈາກ​ໂຄງການ​ເປັນ​ຢ່າງ​ດີ ອັນ​ໄດ້ເຮັດ​ໃຫ້​ຊີວິດ​ການ​ເປັນ​ຢູ່ ຂອງປະຊາຊົນດີຂຶ້ນ, ຜູ້​ທີ່ໄດ້​ຮັບ​ຜົນ​ກະທົບ ກໍໄດ້​ຮັບ​ການ​ຊົດ​ເຊີຍ ແລະ ຊ່ວຍເຫລືອ​ດ້ານ​ຕ່າງໆ ເປັນຕົ້ນ ຄ່າທົດແທນຈາກການສູນເສຍທີ່ດິນທຳມາຫາກິນ, ຈັດສັນທີ່ດິນພ້ອມທີ່ຢູ່ອາໄສ​ໃຫ້ໃໝ່, ຈັດສັນ ພື້ນຖານ ແລະ ສາທາລະນຸປະໂພກຕ່າງໆ, ແບ່ງປັນດິນ ເພື່ອຜະລິດກະສິກຳໃຫ້ແຕ່ລະຄົວເຮືອນ ແລະ ຟື້ນຟູຄຸນນະພາບຊີວິດໃນດ້ານຕ່າງໆ ຢ່າງຕໍ່ເນື່ອງ./.