ບົດສູນທອດພົດ ກ່າວປິດກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VII

ປະຊາຊົນທີ່ຖືກຜົນກະທົບ ຈາກໂຄງການໄຟຟ້າຫົງສາ ມີຊີວິດການເປັນຢູ່ດີຂຶ້ນ


2014-12-30

ຂປລປະຊາຊົນຜູ້ທີ່ຖືກຜົນກະທົບຈາກໂຄງການໄຟຟ້າຫົງສາ ແຂວງໄຊຍະບູລີ ຈຳນວນ 4 ບ້ານ ແລະ ໜຶ່ງໜ່ວຍຜະລິດ ຂອງ ບ້ານເມືອງຫານຈຳນວນ 450​ ຫລັງຄາເຮືອນ, 421 ຄອບຄົວ,1997 ຄົນ ມາຮອດປັດຈຸບັນ ໄດ້ມີຊີວິດການເປັນຢູ່ ທີ່ດີຂຶ້ນກວ່າເກົ່າ.

 

ທ່ານ ສົມມີ ໄຊຍະລາດ ຫົວໜ້າຫ້ອງການຍົກຍ້າຍຈັດສັນ ແລະ ຟື້ນຟູຊີວິດການ ເປັນຢູ່ ຂອງປະຊາຊົນ ໃຫ້ຮູ້ວ່າພາຍຫລັງທີ່ລັດຖະບານແຫ່ງ ສປປ ລາວ ໄດ້ອະນຸມັດສັນຍາ ສຳປະທານ ໂຄງການໃຫ້ບໍລິສັດໄຟຟ້າຫົງສາ ຈຳກັດ​ ເປັນຜູ້ ພັດທະນາໂຄງການໄຟຟ້າຫົງສາ ກໍໄດ້ມີການລົງສຳຫລວດ ແລະ ເກັບກຳຂໍ້ມູນໃນເຂດພື້ນທີ່ຄາດວ່າ ຈະໄດ້ຮັບຜົນກະທົບ ໂດຍກົງໃນເຂດ ພື້ນທີ່ຂຸດຄົ້ນຖ່ານຫີນ ແລະ ເຂດກໍ່ສ້າງໂຮງໄຟຟ້າ ເຊິ່ງລວມມີ 4 ບ້ານທີ່ຖືກຜົນກະທົບ ຄື: ບ້ານນາໄມ້ຍົມ, ບ້ານຈຳປາ, ບ້ານນາໜອງຄຳ, ບ້ານນາຊາຍຄຳ ແລະ 1 ໜ່ວຍຜະລິດ 13 ຄອບຄົວ ຂອງບ້ານເມືອງຫານ ເຊິ່ງມາຮອດ ປັດຈຸບັນບ້ານດັ່ງກ່າວ ແມ່ນໄດ້ຖືກຍົກຍ້າຍໄປຢູ່ບ້ານຈັດສັນໃໝ່ແລ້ວ ໂດຍ ໂຮມເຂົ້າກັນເປັນບ້ານດຽວຄືບ້ານນາແກ່ນຄຳ ຕາມທິດຊີ້ນຳຂອງຂັ້ນເທິ່ງ ແລະ ປະຊາຊົນ ໃນກຸ່ມ ບ້ານທີ່ຖືກຍົກຍ້າຍ​ ແມ່ນໄດ້ຮັບເງິນຊົດເຊີຍຊັບສິນເດີມ, ເຮືອນ 1 ຫລັງໃນເນື້ອທີ່ປຸກສ້າງ 450 ຕາແມັດ/ຄອບຄົວ, ເນື້ອທີ່ດິນທຳການຜະລິດ 2 ເຮັກຕາ ​ໃນນີ້ແມ່ນປູກຢາງພາລາ 1 ເຮັກຕາ ແລະ ປູກ ພືດທາງເລືອກອີກ 1 ເຮັກຕາ,  ຮັບປະກັນ 1 ແຮງງານຕໍ່ 1 ຄອບຄົວ ຕ້ອງມີວຽກເຮັດງານທຳ ຕະຫລອດ ໄລຍະສຳປະທານຂອງໂຄງການ.  ນອກນັ້ນໃນໄລຍະຂ້າມຜ່ານ​ ຍັງມີການຈັດຫາ ອາຫານໃຫ້ທຸກຄອບຄົວຕະຫລອດໄລຍະ ປີທຳອິດ ຄືເຂົ້າສານໜຽວ 25 ກິໂລຕໍ່ຄົນຕໍ່ເດືອນໄຂ່ 8 ໜ່ວຍຕໍ່ຄົນຕໍ່ເດືອນ ແລະ ຊີ້ນ0,8 ກິໂລຕໍ່ຄົນຕໍ່ປີ. ພ້ອມນັ້ນໜ່ວຍງານພັດທະນາສັງຄົມຂອງ ບໍລິສັດໄຟຟ້າຫົງສາ ຈຳກັດ ຍັງໄດ້ສຸມ​​ໃສ່ສົ່ງເສີມຝຶກອົບຮົມອາຊີບທາງເລືອກໃຫ້ປະຊາຊົນ ເຊັ່ນ​: ການກະເສດລ້ຽງສັດນ້ອຍ-​ໃຫຍ່ ປູກຢາງພາລາປູກເຫັດ,ລ້ຽງປາຕ່ຳຫູກນວດແຜນບູຮານການຄ້າ, ຈັກສານ, ຂັບລົດບັນທຸກໜັກ, ສ້ອມແປງເຄື່ອງຈັກທາງດ້ານການກະເສດ ແລະ ອື່ນໆ.

 

ທ່ານ ຍັງໃຫ້ຮູ້ອີກວ່າບໍລິສັດໄຟຟ້າຫົງສາ ຈຳກັດ ໄດ້ເຮັດຕາມສັນຍາສຳປະທານ​ ທີ່ໄດ້ລະບຸໄວ້ໂດຍເລີ່ມ ຈາກການພັດທະນາພື້ນຖານໂຄງລ່າງ ເປັນຕົ້ນໄດ້ສ້າງ ຕະຫລາດ,ໂຮງຮຽນ,​ ໂຮງໝໍ, ລະບົບ ນໍ້າປະປາ, ໄຟຟ້າ, ຫ້ອງການບ້ານ, ວັດ ແລະ ເສັ້ນທາງປູຢາງ ເຂົ້າທຸກຮ່ອມຂອງບ້ານ ເພື່ອ ຄວາມ ສະດວກໃນການໃຊ້ຊີວິດຂອງປະຊາຊົນ. ນອກນັ້ນ ໃນສັນຍານັ້ນຍັງໄດ້ລະບຸຊັດເຈນວ່າ ພາຍ ຫລັງທີ່ຍົກຍ້າຍແລ້ວ 3 ປີ ​ປະຊາຊົນຕ້ອງມີລາຍຮັບຫລຸດພົ້ນເສັ້ນແບ່ງຄວາມທຸກຍາກ ​ແລະ ພາຍໃນ 10​ ປີ ປະຊາຊົນຕ້ອງມີລາຍຮັບເພີ່ມ​​ເປັນ 150ເປີເຊັນ ທຽບໃສ່ລາຍ ໄດ້ສະເລ່ຍ ກ່ອນການຍົກຍ້າຍ./.