ບົດສູນທອດພົດ ກ່າວປິດກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VII

ແຂ່ງຂັນສີມືແຮງງານ ຊີງຂັນລັດຖະມົນຕີກະຊວງ ພບ


2017-05-09

ສະຫະພັນ​ກຳມະບານ​ ກະຊວງ​ພະລັງງານ ແລະ ບໍ່​ແຮ່ (​ພບ) ຮ່ວມ​ກັບ​ລັດ​ວິ​ສາ​ຫະ​ກິດໄຟຟ້າ​ລາວ (​ຟຟລ) ຈັດ​ງານແຂ່ງຂັນ​ສີມື​ແຮງ​ງານ​ຊີງ​ຂັນ​ລັດຖະ​ມົນຕີ​ກະຊວງ ​ພບ ຄັ້ງ​ທີ 1 ເພື່ອ​ສ້າງ​ຂະ​ບວນ​ການ​ຄຳນັບ​ຮັບຕ້ອນ​ວັນ​ກຳມະກອນ​ສາກົນ (1 ພຶດສະພາ) ຄົບຮອບ 131 ປີ ທັງເປັນ​ການ​ຮັດ​ແໜ້ນ​ຄວາມ​ສາ​ມັກຄີ​ຮັກແພງ​ເຊິ່ງ​ກັນ ແລະ ກັນ ລະຫວ່າງຮາກ​ຖານ​ກຳມະບານ ແລະ ສະຫະພັນ​ກຳມະບານ​ອ້ອມຂ້າງ​ກະຊວງ ​ພບ ທ້ອງຖິ່ນ ແລະ ພາກ​ທຸລະ​ກິດ​ຕ່າງໆ.

ງານ​ແຂ່ງຂັນໄດ້​ຈັດ​ຂຶ້ນ​ວັນ​ທີ 27 ເມສາ 2017 ຢູ່ ​ຟຟລ ໂດຍມີ​ທ່ານ ຄຳ​ມະນີ ອິນ​ທິ​ລາດ ລັດຖະ​ມົນຕີ​ກະຊວງ ​ພບ ທ່ານ ກອງສີ ແສງ​ມະນີ ຮອງ​ລັດ​ຖະ​ມົນຕີ​ກະຊວງ​ສຶກ​ສາ​ທິ​ການ ແລະ ກີລາ ພ້ອມ​ດ້ວຍ​ຜູ້ຕາງໜ້າ​ສູນກາງ​ກຳມະບານ​ລາວ ກຳ​ມະບານ​ກະຊວງ ແລະ ພາກສ່ວນກ່ຽວຂ້ອງ​ເຂົ້າ​ຮ່ວມ.

ງານ​ແຂ່ງຂັນ​ຄັ້ງ​ນີ້ ດຳເນີນແຕ່​ວັນ​ທີ 27-28 ເມສາ 2017 ໂດຍ​ແຂ່ງຂັນ​ໃນ​ຂົງເຂດ​ໄຟຟ້າ ລວມ​ມີ 4 ຫົວຂໍ້ຄື: ການ​ກວດສອບ​ໝໍ້​ແປງ​ຈຳໜ່າຍ​ພາກ​ສະໜາມ ການ​ປ່ຽນ​ດອກ​ກັນ​ໄຟ​ພາກ 22 KV ການ​ເຊື່ອມ​ຕໍ່​ສາຍ​ໄຟ ແລະ ດຶງ​ສາຍພາກ 22 KV ແລະ ວິທີ​ບໍລິການ​ລູກ​ຄ້າ ໂດຍ​ມີ 41 ຄະນະ ໃນ​ນີ້ ຈາກ ​ຟຟລ 39 ຄະນະ ແລະ ຈາກ​ລັດ​ວິ​ສາ​ຫະກິດ​ກໍ່ສ້າງ ແລະ ຕິດ​ຕັ້ງ​ໄຟຟ້າ 2 ຄະນະ ເຂົ້າ​ຮ່ວມ.

ທ່ານ ຄຳ​ມະນີ ອິນ​ທິ​ລາດ ໄດ້​ກ່າວ​ວ່າ: ການ​ແຂ່ງຂັນ​ຄັ້ງ​ນີ້ ມີ​ຄວາມ​ໝາຍ​ສຳຄັນ​ຫຼາຍ​ ເພາະນອກຈາກ​ຈະ​ເປັນ​ການ​ສ້າງ​ຂະບວນ​ການ​ຕ້ອນຮັບ​ວັນ​ກຳ​ມະກອນ​ສາກົນ​ແລ້ວ ຍັງ​ເປັນ​ການໄລຍະ​ທີ່​ຂະ​ບວນ​ການ​ແຂ່ງຂັນ​ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ ແຜນ​ພັດທະນາເສດຖະກິດ-ສັງຄົມ 5 ປີ ຄັ້ງ​ທີ VIII ການ​ປະຕິບັດ​ແຜນ​ພັດ​ທະນາ​ວຽກ​ງານ​ພະລັງງານ ແລະ ບໍ່​ແຮ່ ນອກ​ນີ້​ຍັງ​ເປັນ​ການ​ຊຸກຍູ້-ສົ່ງເສີມ​ຄວາມ​ຫ້າວຫັນ ແລະ ການສະແດງ​ອອກ​ຂອງ​ພະນັກງານ-ກຳມະກອນ​ໃນ​ການ​ໃຊ້ຫົວຄິດ​ປະດິດ​ສ້າງ ເຊິ່ງ​ຈະ​ເປັນບາດກ້າວ​ສຳຄັນ​ປະກອບສ່ວນເຂົ້າ​ໃນ​ການ​ສືບຕໍ່​ປັບປຸງ​ການ​ຈັດຕັ້ງ ແລະ ການເຄື່ອນໄຫວ​ຂອງອົງການ​ກຳມະບານ ແລະ ສະມາ​ຊິກ​ກຳມະບານ​ພາຍ​ໃນ​ຂະແໜງ ​ພບ ມີ​ຄວາມ​ໜັກ​ແໜ້ນຂຶ້ນ​ຕື່ມ.