ບົດສູນທອດພົດ ກ່າວປິດກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VII

ສຶກສາຄວາມເປັນໄປໄດ້ ໂຄງການເຂື່ອນໄຟຟ້ານ້ຳສັງ


2016-11-27

ພິທີ​ເຊັນ​ບົດ​ບັນທຶກ​ຄວາມເຂົ້າໃຈ​ ສຶກ​ສາ​ຄວາມ​ເປັນ​ໄປ​ໄດ້ ໂຄງການ​ເຂື່ອນ​ໄຟຟ້າ​ອະເນກ​ປະສົງ​ຂະໜາດ​ນ້ອຍ (ຂະໜາດ 5 ເມ​ກາ​ວັດ) ນ້ຳ​ສັງ ແລະ ໂຄງການ​ພັດທະນາ​ຊົນ​ລະ​ກະເສດລ້ອງ​ນ້ຳ​ຕອນ ເມືອງ​ສັງ​ທອງ ນະຄອນ​ຫຼວງ​ວຽງ​ຈັນ (ນວ) ລະຫວ່າງອົງການ​ປົກຄອງ ນວ ຕາງໜ້າ​ໂດຍ​ພະ​ແນກ​ແຜນການ ແລະ ການ​ລົງທຶນ ນວ ກັບ​ບໍ​ລິສັດ ລາວ​ສະໄໝ​ກໍ່ສ້າງ​ຂົວ-ທາງ ແລະ ບໍລິການ ຈຳກັດ​ຜູ້​ດຽວ ໄດ້ຈັດ​ຂຶ້ນ​ວັນ​ທີ 10 ພະຈິກ 2016 ທີ່ຟາມ​ກາບ​ຊ້ອນ ນວ ຮ່ວມ​ລົງນາມ​ລະຫວ່າງ​ທ່ານ ພູ​ຂົງ ບັນນະວົງ ຫົວໜ້າ​ພະ​ແນກ​ແຜນການ ແລະ ການ​ລົງທຶນ ນວ ແລະ ທ່ານ ພູ​ວົງ ກໍ​ຣະ​ສັກ ປະທານ​ກຸ່ມບໍລິສັດ ລາວ​ສະໄໝ ແລະ ເຊັນຊ້ອງ​ໜ້າ​ມີ​ທ່ານ​ເຈົ້າເມືອງ​ສັງທອງ ຫົວໜ້າ​ພະ​ແນກ​ພະລັງງານ ແລະ ບໍ່​ແຮ່ ຫົວໜ້າ​ພະແນກ​ກະສິກຳ ແລະ ປ່າໄມ້ ນວ ແລະ ຜູ້ອຳນວຍການ​ບໍລິສັດ​ດັ່ງກ່າວ ​ເຂົ້າ​ຮ່ວມ​ເປັນ​ສັກຂີ​ພິຍານ ມີ​ທ່ານ ແກ້ວ​ພິລາ​ວັນ ອາ​ໄພລາດ ຮອງ​ເຈົ້າ​ຄອງ ນວ ທ່ານ ພວງ​ປະ​ຣິ​ສັກ ປຣະ​ວົງ​ວຽງ​ຄຳ ຮອງ​ລັດຖະມົນຕີກະຊວງ​ກະ​ສິກຳ ແລະ ປ່າໄມ້ ນວ ພ້ອມ​ດ້ວຍພາກສ່ວນ​ທີ່​ກ່ຽວຂ້ອງ​ທັງ​ສອງຝ່າຍ.

ການ​ພັດທະນາ​ໂຄງການເຂື່ອນ​ໄຟຟ້າ​ຂະໜາດ​ນ້ອຍ​ນ້ຳ​ສັງ ຕິດ​ພັນ​ກັບ​ໂຄງການ​ຊົນ​ລະ​ກະເສດ​ລ້ອງ​ນ້ຳ​ຕອນ ເພື່ອ​ຂະຫຍາຍເນື້ອທີ່​ສະໜອງ​ນ້ຳ​ຊົນ​ລະ​ປະທານ​ເຂດ​ໃຕ້​ເຂື່ອນ ແລະ ພື້ນ​ທີ່ການ​ນຳ​ໃຊ້​ທີ່​ດິນ​ຕາມ​ສາຍ​ນ້ຳຕອນ ແມ່ນ​ໂຄງການ​ໜຶ່ງ​ທີ່​ມີຄວາມ​ສຳຄັນ​ຕໍ່​ຊີວິດ​ການ​ເປັນ​ຢູ່ຂອງ​ປະຊາຊົນ​ເມືອງ​ສັງ​ທອງ​ ໃຫ້ຫຼຸດ​ພົ້ນ​ອອກ​ຈາກ​ຄວາມທຸກ​ຍາກເທື່ອ​ລະ​ກ້າວ ໂຄງການ​ດັ່ງກ່າວ ມີ​ຫົວ​ງານ​ຕັ້ງ​ຢູ່​ບ້ານ​ວັງ​ມ້າ ຫ່າງຈາກ​ເທສະ​ບານ​ເມືອງ​ສັງ​ທອງໄປ​ທາງ​ທິດເໜືອ ປະມານ 35 ກິໂລ​ແມັດ ແລະ ຫ່າງ​ຈາກ​ໃຈກາງ ນວ ປະມານ 70 ກິໂລແມັດ ໂຄງການ​ແມ່ນ​ເພື່ອ​ຜັນ​ເອົາ​ນ້ຳ​ຈາກສາຍ​ນ້ຳ​ລຸ່ມ​ເຮືອນ​ຈັກ​ເຂື່ອນ​ໄຟຟ້າ​ນ້ຳ​ສັງ ເພື່ອ​ສະໜອງ​ນ້ຳ​ໃຫ້ເນື້ອທີ່​ຊົນລະປະທານ​ລຽບ​ທັງສອງ​ຝັ່ງ​ນ້ຳ​ຕອນ​ ປະມານ 8.000 ເຮັກຕາ ນອກຈາກ​ນີ້ ບໍ່​ພຽງ​ແຕ່ສາມາດ​ຜະລິດ​ກະແສ​ໄຟຟ້າ​ຊົມໃຊ້​ພາຍ​ໃນ ແລະ ຍັງ​ສາມາດຜັນ​ນ້ຳ​ຈາກ​ນ້ຳ​ສັງ​ນຳ​ໃຊ້​ເຂົ້າ​ໃນການ​ຕ້ານ​ແລ້ງ ແລະ ຕ້ານ​ຖ້ວມ ເສີມ​ຂະຫຍາຍ​ການ​ຜະລິດ​ຂອງປະຊາຊົນ​ທີ່​ມີ​ຄວາມ​ຮັບປະກັນດ້ານ​ການ​ສະໜອງ​ນ້ຳ ແລະ ຍົກສະມັດ​ທະ​ພາບ​ການ​ຜະລິດ​ປົກປັກ​ຮັກສາ​ສະພາບ​ແວດ​ລ້ອມ ແລະ ພັດທະນາ​ເຂດ​ອ່າງ​ໂຕ່ງ ເຊິ່ງ​ໂຄງການ​ດັ່ງກ່າວ ​ຈະ​ໃຊ້​ເວລາ​ສຶກ​ສາ​ຄວາມ​ເປັນ​ໄປ​ໄດ້ 18 ເດືອນ ​ນັບ​ແຕ່​ມື້​ລົງ​ລາຍ​ເຊັນ​ເປັນຕົ້ນ​ໄປ ຈາກ​ນັ້ນ ກໍ່​ຈະ​ກ້າວ​ສູ່​ການດຳເນີນ​ໂຄງການ ແລະ ຈະ​ໃຫ້ສຳເລັດ​ພາຍ​ໃນ 2 ປີ.