ບົດສູນທອດພົດ ກ່າວປິດກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VII

ກອງປະຊຸມ ສຸດຍອດການຮ່ວມມືດ້ານພະລັງງານສາກົນ ໃນ ສປປ ລາວ 2017 (lao International Power Summit 2017) ໃນວັນທີ 22-23 ມິຖຸນາ 2017 ທີ່ ໂຮງແຮມດອນຈັນພາເລດ ນະຄອນຫຼວງວຽງຈັນ


2017-06-25

ໃນວັນທີ 22-23 ມິຖຸນາ 2017, ກະຊວງພະລັງງານ ແລະ ບໍ່ແຮ່ ໄດ້ຮັບກຽດເປັນເຈົ້າພາບ ຈັດກອງປະຊຸມ ສຸດຍອດການ​ຮ່ວມ​ມືດ້ານພະລັງງານສາກົນ ໃນ ສປປ ລາວ 2017 (Laos International Power Summit 2017) ຮ່ວມກັບ ກຸ່ມບໍລິສັດ Wispool ໂດຍກຸ່ມບໍລິສັດດັ່ງກ່າວໄດ້ສະໜັບສະໜູນດ້ານງົບປະມານ ແລະ ຄ່າໃຊ້ຈ່າຍຕ່າງໆໃນການຈັດກອງປະຊຸມໃນຄັ້ງນີ້. ກອງປະຊຸມດັ່ງກ່າວ ຄາດວ່າມີຜູ້ເຂົ້າຮ່ວມທັງໝົດປະມານ 200 ກວ່າຄົນ, ມີຊ່ຽວຊານທີ່ເປັນຜູ້ບັນຍາຍຈາກ ຂະແໜງອຸດສາຫະກໍາ ປະມານ 40 ທ່ານ ແລະ ມີງານວາງສະແດງ ຈາກພາຍໃນ ແລະ ຕ່າງປະເທດ. ໃນນັ້ນທາງຜູ້ໃຫ້ທຶນ ໄດ້ຈັດສັນຫ້ອງວາງສະແດງ ສໍາລັບ ກະຊວງພະລັງງານ ແລະ ບໍ່ແຮ່ ຈຳນວນ 1 ຫ້ອງ ແລະ ລັດວິສາຫະກິດໄຟຟ້າລາວ ຈຳນວນ 1 ຫ້ອງ ເພື່ອວາງສະແດງ ກ່ຽວກັບ ການພັດທະນາພະລັງງານໃນ ສປປລາວ.

 

ຈຸດປະສົງຂອງການຈັດກອງປະຊຸມໃນຄັ້ງນີ້ແມ່ນເພື່ອ ເປັນການເຕົ້າໂຮມເອົາ ບັນດາພະນັກງານລັດ, ຜູ້ວາງນະໂຍບາຍ, ຜູ້ດຳເນີນທຸລະກິດໄຟຟ້າ ລວມທັງ ບັນດາລັດວິສາຫະກິດ ແລະ ເອກະຊົນ, ບັນດານັກລົງທຶນ ແລະ ຜູ້ໃຫ້ບໍລິການຕ່າງໆ ເພື່ອແລກປ່ຽນ ແລະ ປຶກສາຫາລື ກ່ຽວກັບ ການພັດທະນາຕະຫຼາດພະລັງງານໃນພາກພື້ນ, ບັນຫາທີ່ພວມປະເຊີນຢູ່ໃນຂະແໜງອຸດສາຫະກຳພະລັງງານ ແລະ ພ້ອມກັນສະໜັບສະໜູນ ຂະແໜງອຸດສາຫະກໍາພະລັງງານຂອງພາກພື້ນໃຫ້ມີຄວາມກ້າວໜ້າ.

 

ກອງປະຊຸມຄັ້ງນີ້ ໄດ້ຈັດຂຶ້ນພາຍໃຕ້ຫົວຂໍ້ “ການເພີ້ມປະສິທິພາບໃນການເຊື່ອມໂຍງພະລັງງານ ເພື່ອການຂັບເຄື່ອນທີ່ຂະຫຍາຍຕົວແບບຍືນຍົງ” ເຊິ່ງຫົວຂໍ້ດັ່ງກ່າວ ຈະກວມເອົາ ບັນດານະໂຍບາຍ ແລະ ລະບຽບການ ສໍາລັບ ການລົງທຶນດ້ານທຸລະກິດໄຟຟ້າ, ການຊື້-ຂາຍໄຟຟ້າ ແລະ ການຄຸ້ມຄອງຄວາມສ່ຽງຕ່າງໆ; ການຜະລິດໄຟຟ້າ ແລະ ການພັດທະນາພະລັງງານທົດແທນອື່ນໆ; ການຈັດສັນງົບປະມານຂອງໂຄງການ, ລະບົບສາຍສົ່ງ ແລະ ການຈຳໜ່າຍ; ການຜະລິດພະລັງງານຄວາມຮ້ອນຖ່ານຫີນທີ່ສະອາດ ແລະ ອື່ນໆ.

 

ຈາກການຈັດກອງປະຊຸມດັ່ງກ່າວ ຄາດວ່າ ສປປ ລາວ ຈະໄດ້ຮັບຜົນປະໂຫຍດຄືດັ່ງລຸ່ມນີ້:

  • ນຳ​ໃຊ້​ໂອກາດ​ທີ່​ເປັນ​ເຈົ້າພາບ​ກອງປະຊຸມເພື່ອໂຄສະນາໃຫ້ເຫັນເຖິງການພັດທະນາຂະແໜງພະລັງງານໃນ ສປປ ລາວ ວ່າມີການຂະຫາຍຕົວໃນທ່າທີ່ກ້າວໜ້າ.
  • ບັນດາ​ຂະ​ແໜງ​ການ​ທີ່ກ່ຽວຂ້ອງ​ກັບ ຂະແໜງ​ພະລັງງານ ຈະ​ໄດ້​ຮຽນ​ຮູ້ ​ແລະ ​ຖອດ​ຖອນ​ບົດຮຽນ ກ່ຽວກັບ ບັນດາ​ກົນ​​​ໄກ ແລະ ​ແຜນການພັດທະນາພະລັງງານໃນ ສປປລາວ.
  • ພະນັກງານລັດຖະກອນທີ່​ມີ​ສ່ວນ​ຮ່ວມ​ໃນການ​ຈັດ​ກອງ​ປະຊຸມ​ຈະ​ໄດ້​ຮຽນ​ຮູ້ ​ແລະ ຝຶກ​ອົບຮົມຄວາມ​ຮູ້ຄວາມ​ສາມາດ ​ໃນ​ການ​​ເຮັດ​ວຽກ​ຮ່ວມ​ມື​ສາກົນ​ດີ​ຂຶ້ນ;
  • ສປປລາວຈະ​ມີ​​ໂອກາດເຜີຍ​ແຜ່​ວັດທະນາ​ທຳ​ປະ​ເພນີ​ໃຫ້​ກັບ​ຜູ້​ເຂົ້າ​ຮ່ວມ ​ແລະ ສົ່ງ​ເສີມ​ການ​ທ່ອງ​ທ່ຽວ​ໄປ​ໃນ​​ໂຕ.