ບົດສູນທອດພົດ ກ່າວປິດກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VII

ຮ່ວມກັນພັດທະນາໄຟຟ້າຊົນນະບົດ ສ້າງຜົນປະໂຫຍດໃຫ້ປະຊາຊົນ


2017-06-18

ພິທີ​ລົງ​ນາມ​ບົດ​ບັນທຶກ​ການຮ່ວມ​ມື​ດ້ານ​ວິຊາ​ການ ​ສຳລັບ​ສຶກສາ​ແຜນ​ພັດທະນາ​ໄຟຟ້າ​ຊົນ​ນະບົດ ໄລຍະ​ສຸດ​ທ້າຍ ໄດ້​ຈັດ​ຂຶ້ນ​ວັນທີ 2 ມິຖຸນາ 2017 ຢູ່​ນະຄອນຫຼວງ​ວຽງ​ຈັນ ລະຫວ່າງທ່ານ ຈັນໂທ ມີ​ລັດຕະນະ​ແພງ ວ່າການ​ຫົວໜ້າ​ສະ​ຖາ​ບັນ​ສົ່ງເສີມພະລັງງານ​ທົດ​ແທນ ກະຊວງ​ພະລັງ​ງານ ແລະ ບໍ່​ແຮ່ (​ພບ) ທ່ານ ບຸນ​ອູ້ມ ສີ​ວັນເພັງ ຜູ້ອຳນວຍການໃຫຍ່​ລັດ​ວິ​ສາ​ຫະ​ກິດ​ໄຟຟ້າ​ລາວ (​ຟຟລ) ແລະ ທ່ານ Xu Xiaofei ຜູ້ອຳນວຍການ​ໃຫຍ່​ກຸ່ມ​ບໍລິສັດ Pinggao ​ສປ ຈີນ ໂດຍ​ຊ້ອງ​ໜ້າທ່ານ ຄຳ​ມະນີ ອິນ​ທິ​ລາດ ລັດ​ຖະມົນຕີ​ກະຊວງ​ພະລັງງານ ແລະ ບໍ່​ແຮ່ ແລະ ພາກສ່ວນ​ກ່ຽວຂ້ອງ.

ທ່ານ ຈັນໂທ ມີ​ລັດຕະນະ​ແພງ ໄດ້​ກ່າວ​ວ່າ: ໂຄງການ​ຮ່ວມ​ມື​ນີ້ ຈະ​ສ້າງ​ຜົນ​ປະໂຫຍດ​ຫຼາຍ​ດ້ານ ໂດຍ​ສະເພາະ ການຈັດຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ​ຂອງ​ລັດຖະບານ ເພື່ອ​ໃຫ້ບັນລຸ​ໄດ້​ຕົວ​ເລກ​ຄາດໝາຍ​ການຂະຫຍາຍ​ລະບົບ​ຕາ​ຂ່າຍ​ໄຟຟ້າໃນ​ທົ່ວ​ປະເທດ​ ໃຫ້​ໄດ້ 95% ໃນ​ປີ 2020 ແລະ 98% ໃນ​ປີ 2025 ຈຸດ​ຂອງ​ໂຄງການ​ແມ່ນ​ເພື່ອ​ປັບປຸງ ແລະ ສ້າງ​ຖານ​ຂໍ້​ມູນ​ແຜນທີ່ລະບົບ​ໄຟຟ້າ​ຊົນນະບົດ​ທີ່​ມີ​ຢູ່ແລ້ວ ແລະ ສຶກ​ສາ​ແຜນ​ຂະຫຍາຍ​ໄຟຟ້າ​ໄປ​ສູ່​ເຂດ​ໃໝ່​ທີ່​ບໍ່​ທັນ​ມີ​ໄຟຟ້າ ສຶກ​ສາ ແລະ ປັບປຸງຖານ​ຂໍ້​ມູນ​ລະບົບ​ສາຍ​ສົ່ງ​ທີ່​ສຳເລັດ​ການ​ກໍ່ສ້າງ​ແລ້ວ ກຳລັງ​ກໍ່ສ້າງ ແລະ ມີ​ແຜນ​ຈະ​ກໍ່ສ້າງ ສຶກສາ ແລະ ປັບປຸງ​ຖານ​ຂໍ້​ມູນ​ໄຟຟ້າ​ນອກ​ລະບົບ ໂດຍ​ການ​ເກັບກຳ​ຂໍ້​ມູນ​ຢູ່​ແຕ່​ລະ​ເຂດ​ໃຫ້​ມີ​ຄວາມ​ຊັດ​ເຈນ​ກວ່າ​ເກົ່າ ເພື່ອ​ໃຫ້​ສາມາດ​ນຳ​ໃຊ້​ໄຟຟ້າ​ນອກ​ລະບົບ​ໄດ້ຢ່າງ​ເໝາະ​ສົມ ແລະ ເພື່ອ​ສະຫຼຸບລາຍ​ງານ​ຜົນ​ການ​ສຶກ​ສາ​ຂໍ້​ມູນທັງ​ໝົດ ໂດຍ​ສະເພາະ ບັນດາໂຄງການ​ທີ່​ມີ​ຄວາມ​ເປັນ​ໄປ​ໄດ້ ເພື່ອ​ກຳນົດ​ເຂົ້າ​ໃນ​ແຜນ​ຍຸດ​ທະສາດ​ການ​ພັດທະນາ​ລະບົບ​ໄຟຟ້າ ຮອດ​ປີ 2030 ໂຄງການ​ນີ້​ມີ​ໄລຍະ​ເວລາ 24 ເດືອນ ເຊິ່ງ​ພາຍຫຼັງ​ສຳເລັດ​ການ​ສຶກ​ສາ​ຄວາມເປັນ​ໄປ​ໄດ້ ຈະ​ໄດ້​ຮ່ວມ​ກັນ​ຊອກຫາ​ແຫຼ່ງ​ທຶນ​ດອກ​ເບ້ຍ​ຕ່ຳ ແລະ ການ​ທົດ​ແທນ​ຍາວ​ນານ ໃນ​ນີ້ ກຸ່ມ​ບໍລິສັດ Pinggao ຈະ​ເປັນຜູ້​ຮັບຜິດຊອບ​ງົບປະມານ​ໃນ​ການຈັດຕັ້ງ​ປະຕິບັດ​ໂຄງການ ແລະ ພາກ​ລັດ​ຈະ​ສົມທົບ​ຈຳນວນ​ໜຶ່ງແບບ​ບໍ່​ມີ​ເງິນສົດ.